Påske i Jotunheimen

Frå vi opnar i februar til over påske kjører vi opp kilometervis med skispor med skuter og sporleggjar mellom Besseggen Fjellpark, Hindseter, Gjendesheim og Bessheim.

I år 1901 fekk eigaren av Bessheim, Iver Storvik, 100 kroner frå Foreningen for Ski – Idrettens Fremme (Skiforeningen i dag) for å halde oppe i påska. Etter det har familien teke i mot skiglade påskegjestar kvart år. Påska på Bessheim er skiturar, mykje god mat, reinsdyret Iver, øl i solveggen, foredrag, bålbrenning, påskeskirenn, guida turar og god stemning påskekvelden🌞

Vidare følgjer det rikhaldige påskeprogramet og ein spanande påskemeny.

Velkomen til fjells!

Påskeprogram 2023

Søndag 2. april. Quiz

Vi arrangerer quiz i peisstugu kl. 20.30. Meld på lag til quizmesteren frå klokka 20.15.

Tysdag 4. april. Middagsbuffet og besøk av vinimportøren Bertil & Martens

Middagsbuffet med lokale smakar og tranchering av lam. Dessertbord. Den lokale vinimportøren Bertel & Martens frå Otta presenterer eit utval av vinane sine under måltidet. Gjestene kan gå til bords kva tid dei vil mellom 18.30 og 20.30. Middagen kostar kr. 480,- Halv pris for barn mellom 3 og 12 år. Vin kjem utanom. Hugs å bestille bord på førehand.

Onsdag 5. april. Foredrag om ei reiseskildring frå mars 1911

Kåre Lund held foredrag om vinterturisme her på Bessheim på tidleg på nittenhundretalet. Briten J. H. W. Fulton hadde eit opphald her i mars 1911, og skreiv ei interessant reiseskildring om turen. Det er denne reiseskildringa som er utgangspunktet for foredraget. Her får du eit innblikk i blant anna reiseruta, skiturane, sætringa og maten. I peisstugu klokka 20.30.

Torsdag 6. april. Ut på båltur

Vi lagar bålplass ikkje langt frå Bessheim. Vi går på ski eller truger dit. Det blir bål med varm saft og pølsegrilling. Passar for både barn og vaksne. Oppmøte i resepsjonen klokka 11.00.

Torsdag 6. april. Foredrag om den eldste kulturhistoria i Jotunheimen

Ivrig fjellkar Reidar Marstein og fylkesarkeolog Espen Finstad held foredrag om dei arkeologiske funna sine i Jotunheimen. Dei har dei siste åra leitt blant anna etter gamle ferdselsvegar, hustofter og gjenstandar som smeltar fram i brekanten. Reidar fann ei sko som viste seg og vera 3400 år gamal for nokre år sidan. I sommar fann han fiskefeller i Tesse som viste seg å vera 7000 år gamle. I peisstugu klokka 20.30.

Langfredag 7. april. Skitur til Besshø med turleiar

Langfredag vil Jon Sjurgard vera turleiar til Besshø. Avgang frå her klokka 08.30. Fjellski. Dei som melder seg på må ha skikkeleg utstyr og ha erfaring frå litt lengre skiturar i fjellet. Utstyrsliste: gode og varme turklede, ullundertøy, vindtette ytterklede, varme vottar med vindtrekk over, vindtett og varm lue, solbriller, drikke, stor nok niste, fjellski, skismurning, feller og sitjeunderlag. Jon er ein ivrig fjellkar som er veldig godt kjent i Jotunheimen. Han deler gjerne av kunnskapen sin om fjellet. Prisen er kr. 450,- per person. Påmelding innan onsdag 31. mars på telefon 612 38 913 eller på e-post: post@bessheim.no

Langfredag 7. april. Stor påskebuffet

Stor påskebuffet med varme og kalde rettar og dessertbord. Middagen kostar kr. 520,- per person. Halv pris for barn mellom 3 og 12 år. Bestilling i resepsjonen, på telefon 61 23 89 13 eller på e-post: post@bessheim.no innan klokka 22.00 kvelden før.

Langfredag 7. april. Quiz

Vi arrangerer quiz i peisstugu kl. 20.30. Meld på lag til quizmesteren frå klokka 20.15.

Laurdag 8. april. Sledetur med reinane Iver og Nils

Reinsgjetarane i Vågå Tamrein, Jørn Slettom og Ola Vaagaasarøygard, stiller med reinane Iver og Nils og slede. Du såg dei kanskje i NRK-serien «Gjeterar i Jotunheimen»? Bli med og kjør ei lita runde på isen på Øvre Sjodalsvatnet! Passar for barn. Møt opp kva tid du vil frå klokka 11.00 til klokka 14.00. Kroner 100,- per person.

Laurdag 8. april. Påskeskirenn og hoppkonkurranse kl. 1300.

Tradisjonen tru vert det også i år arrangert påskeskirenn og hoppkonkurranse. Kle deg gjerne ut! Påmelding i resepsjonen, samt ute før start. Grilling av pølser og varm saft.

Laurdag 8. april. Påskekveldsfeiring!

Vi serverer treretters middag klokka 1900. Menyen er forskjellige smakar av fjellaure til forrett, filet av rein til hovudrett og blautkake, moltekrem og skryller til dessert. Gruppa Bygdafolk spelar til dans og underhaldning. I Bygdafolk spelar Jan og Gro Visdal, Ragnhild Jøndal Bjertnes og Bente og Kristin Akseln Hagen. Middagen kostar kr. 520,- per person. Halv pris for barn mellom 3 og 12 år. Bestilling i resepsjonen, på telefon 61 23 89 13 eller på e-post: post@bessheim.no innan klokka 22.00 kvelden før.

Isfisking

Mange brukar påskedagane her i Sjodalen på isfisking. Du har mange gode fiskevatn og velja i mellom. Øvre og nedre Sjodalsvatn, Gjendeosen og nedre Leirungen er dei mest populære. Det er fin fjellaure i desse vatna. Du må ta med utstyr sjølv. Barn under 16 år fiskar gratis og dei vaksne kan kjøpe fiskekort anten i resepsjonen eller på Vågå Fjellstyre sine fine heimesider: www.vaga-fjellstyre.no

Hundekjøring i Sjodalen

Hundekjøring med slede i vintervakre Sjodalen er ei heilt spesiell oppleving! Vi har to tilbyderar av hundekjøring. På Sjodalen Hyttetun, 18 km nord for Bessheim, er det hundekjøring i palmehelga, skjærtorsdag, langfredag og 1. og 2. påskedag. Sjå www.sjodalenhyttetun.no for meir informasjon. I Randsverk held Jotunheimen Huskylodge til. Ved bestilling på førehand tek dei turen hit til Bessheim. Sjå www.jotunheimenhuskylodge.no

Meny påska 2023

Fredag 31. mars

Bakt torsk

Filet av haustens vilt, med grønsaker, ein god viltsaus og hasselbackpoteter

Sjokoladetallerken

Laurdag 1. april

Middagsbuffet med lokale smakar og tranchering av lam frå garden Snerle i Vågå. Dessertbord.

Søndag 2. april

«Ein smak av Jotunheimen». Ein tallerken med forskjellige lokale godbitar.

Dagens fisk. Lokal fjellaure, dersom vi får tak i det

Crème Brûlée med einebærgranite

Måndag 3. april

Dagens supe

Kokt reinskjøt servert på tradisjonelt vis med lauksaus saus, rotgrønsaker og potetstappe

Brunostkake med bærmousse

Tysdag 4. april

Middagsbuffet med lokale smakar og tranchering av lam frå garden Snerle i Vågå.

Dessertbord.

Den lokale vinimportøren Bertel & Martens presenterer vinane sine.

Onsdag 5. april

Aurefilet med kremsaus

Fersk torsk eller oksefilet, valfritt

Sitronterte

Skjærtorsdag 6. april

Krema fiskesupe

Heilsteikt hjortelår med grønsaker, bakte poteter og saus. Tranchering i spisesalen

Sjokoladedessert

Langfredag 7. april

Stor påskebuffet med varme og kalde rettar og dessertbord.

Påskekvelden – laurdag 8. april (DENNE KVELDEN ER MIDDAGEN KL 1900 FOR ALLE).

Smakar av fjellaure

Reinsdyr frå Vågå med friske grønsaker, viltsaus og potetstappe

Blautkake og moltekrem med skryller

Søndag 9. april

Grava reinsdyr med tyttebærrømme

Kalvekjøt med grønsaker, poteter og saus

Dagens dessert

Prisen på treretters middagsmenyen vår er 480 kr per person. Langfredag og påskekvelden er prisen 520 kr per person. Har du rom inkludert pensjon, er middagen inkludert i prisen.

Det kan bli endringar i menyen.

Middagen blir servert klokka 1830 – 20.30 kvar kveld, og kan bestillast per e-post på post@bessheim.no eller telefon 61 23 89 13.

Sesongen 2023 tilbyr vi i tillegg take away til utleigehyttene. Det går an å bestille ein koldttallerken med smakar av til dømes rein, elg, hjort, potetsalat, eggerører, flatbrød og brød til kr. 340,- per person som du hentar i resepsjonen. Vi må ha bestilling på dette dagen før. Du som har privat hytte i Sjodalen er også velkomen til å benytte deg av dette tilbodet!